កំពង់ចាម៖ ផ្ទះ៥ខ្នង ដែល៣ខ្នងជាផ្ទះធ្វើពីថ្ម និង២ខ្នងទៀត ធ្វើពីឈើប្រក់ក្បឿង នៅក្នុងភូមិ៣ សង្កាត់វាលវង់ ក្រុងកំពង់ចាម ត្រូវបានអគ្គិភ័យឆាបឆេះអស់ទាំងស្រុង នៅវេលាម៉ោង១០ និង៣៥នាទីថ្ងៃអង្គារ ទី៨ ខែមករា ឆ្នាំ ២០១៣ ទំហំនៃការខូចខាតគិតជាប្រាក់រាប់ម៉ឺនដុល្លារ។ នេះបើយោងតាមការបញ្ជាក់ពីអធិការ នគរបាលក្រុង កំពង់ចាម លោក សំ ផាត។
លោក សំ ផាត បានប្រាប់ឲ្យដឹងថា ផ្ទះប្រជាពលរដ្ឋ ៥ខ្នង ដែល៣ខ្នងធ្វើពីថ្ម និង២ខ្នងទៀតធ្វើពីឈើ ត្រូវបានអគ្គិភ័យឆាបឆេះបំផ្លាញអស់ទាំងស្រុង។ លោកបានបន្តថា ក្រោយពេលកើតហេតុកម្លាំងសមត្ថកិច្ចចម្រុះ រួមនិងរថយន្តពន្លត់អគ្គិភ័យ៤គ្រឿងផ្សេងទៀត បាន ព្យាយាម ជួយ អន្តរាគមន៍ដែរ តែដោយអំណាចនៃការឆេះវាខ្លាំងក្លាពេក ទើបមិនអាចជួយពន្លត់ឲ្យបានទាន់ពេលវេលា។
តែទោះជាយ៉ាងណាក្រោយការអន្តរាគមន៍រយៈពេលប្រហែល១ម៉ោង ពោលគឺនៅម៉ោង ១២ថ្ងៃត្រង់ អគ្គិភ័យត្រូវ បានពន្លត់ឲ្យរលត់ទាំងស្រុង មិនបណ្ដាលឲ្យរាលដាលដល់ផ្ទះអ្នកដទៃនោះទេ។
ជនរងគ្រោះជាម្ចាស់ផ្ទះនៅក្នុងហេតុការណ៍អគ្គិភ័យនេះ ម្ចាស់ផ្ទះទី១ ដែលធ្វើពីថ្ម មានទំហំ៣ខ្នង មានឈ្មោះ ញ៉េត ហួយ ភេទស្រី អាយុ ៤៨ឆ្នាំ ម្ចាស់ផ្ទះទី២ ដែលធ្វើពីឈើមានទំហំ២ខ្នង មានឈ្មោះ លី គង់ហេង ភេទ ប្រុស អាយុ ៦៧ឆ្នាំ។
លោកអធិការនគរបាលក្រុងកំពង់ចាម បានដកស្រង់សំដីជនរងគ្រោះអ្នកស្រី ញ៉េត ហួយថា រូបគាត់បាន បាត់បង់អស់មាស ៦តម្លឹង គ្រឿងអលង្ការធ្វើពីពេជ្រមួយចំនួន លុយដុល្លារ ៣៥.០០០ដុល្លារ លុយខ្មែរ ២លាន រៀល និងសម្ភារៈជាច្រើនផ្សេងទៀត។ ដោយឡែកលោក លី គង់ហេង ដោយសារតែកំពុងសោកសៅ មិនអាចបំភ្លឺ ជូនសមត្ថកិច្ចបានឡើយ។
តែតាមការពិនិត្យជាក់ស្តែងនៅកន្លែងកើតហេតុ ក្រៅពីផ្ទះធ្វើពីឈើ២ខ្នងទៅ រថយន្តកាមរីមួយគ្រឿង ដែលចតនៅក្រោមផ្ទះ ក៏បានឆាបឆេះអស់ផងដែរ។
តែតាមការពិនិត្យជាក់ស្តែងនៅកន្លែងកើតហេតុ ក្រៅពីផ្ទះធ្វើពីឈើ២ខ្នងទៅ រថយន្តកាមរីមួយគ្រឿង ដែលចតនៅក្រោមផ្ទះ ក៏បានឆាបឆេះអស់ផងដែរ។
អគ្គិភ័យខាងលើនេះ ត្រូវបានសមត្ថកិច្ចបញ្ជាក់ថា ផ្ដើមចេញពីផ្ទះរបស់លោក លី គង់ហេង។លោក លី គង់ហេង បានបញ្ជាក់ប្រាប់សមត្ថកិច្ចថា នៅមុនពេលកើតហេតុគាត់បើកហ្គាសដាំបាយ ក្រោយពេល ដាំឆ្អិនហើយ គាត់ក៏បានដើរមកមុខផ្ទះស្រាប់តែហ្គាសបានផ្ទុះឡើងបណ្ដាលឲ្យឆាបឆេះតែម្តង។
តែទោះជាយ៉ាងណាអគ្គិភ័យនេះ មិនបានបណ្តាលឲ្យនរណាម្នាក់ រងគ្រោះនោះទេ។ពាក់ព័ន្ធទៅនឹងសំណង នៃការខូចខាតវិញ លោកអធិការ សំ ផាត បានបញ្ជាក់ថា មិនទាន់ដឹងនឹងត្រូវដោះ ស្រាយយ៉ាងណានោះទេ។ តែករណីនេះ ជាការកើតឡើងដោយអចេតនា៕
ប្រភព ដើមអម្ពិល
រូបភាព & Video : Facebook
